أنا اللى دعيت

أنا اللي دعيت عليه ربنا يعميه!
ليا زميل في الشغل من يوم ما جه المكتب وهو مبيحتكش بحد قد كدا ورغم إننا كلنا تقريبا بنحاول نقرب منه إلا إنه بيتعامل بنوع من الحذر معانا ومع ذلك علاقتي بيه كانت طيبة رغم سطحيتها من كام يوم اتفاجئت بيه بيرن عليا وبيطلب إني أنزل معاه شوية وبمجرد ما نزلنا وقعدنا على القهوة لقيته اڼفجر في العياط وكل اللي على لسانه جملة واحدة

أنا اللي دعيت عليه ربنا يعميه.
مكنتش فاهم هو ماله ولا فاهم حتى يقصد إيه وبعد فترة طويلة قدرت أهديه شوية لحد ما بطل عياط.
مسح وشه وبصلي وبصوت مقهور اتكلم
فاكر يوسف ابني يا حمزة
مكانش صعب أفتكره لإنه طفل ميتنسيش جابه معاه المكتب مرة واحدة بس لكن فضلنا كلنا فاكرينه طفل شقي جدا لكن رغم دا مرح جدا ويتحب ربنا يحفظه.
هزيت راسي ومن قبل ما أتكلم كمل هو
أنا اللي ضيعته يا حمزة أنا اللي ضيعته.
خۏفي كان بيزيد وقلقي بشكل لاإرادي كان بيتضاعف وهو رجع يعيط من تاني وهو بيقول
كنت عايزه يبطل والله مكانش قصدي يا رب مكانش قصدي والله.
عطيته كوباية مياه عشان يهدى وبمجرد ما هدى من تاني طلبت منه يصلي على النبي ويفهمني حصل إيه وهو اتكلم..
انت عارف يوسف ابني.. شقي ولمض ومبيقعدش في حتة إلا ويبهدلها.. من فترة لاحظت إنه بدأ ينتبه مع ممثل بطريقة أوڤر شوية قاعد يحفظ أعماله بيقلده بيتكلم زيه حتى الألفاظ الۏحشة اللي بيقولها بقى بيرددها وراه وكل ما حد ينبهه يرد علينا بنفس طريقة الممثل دا.. أمه طبعا مكانتش راضية وأنا خلاص هتجنن من اللي بيعمله لإني مش قادر عليه ولا قادر أمنع عنه الزفت دا وهو كل ما أشيل من قدامه حاجة يتصرف ويشوف فون حد تاني أو يجيبه من التليفزيون.. جه من حوالي شهر وكان شبه نسى نفسه لدرجة إن والدته كانت بتكلمه قام شاتمها لإنه شاف الراجل دا بيعمل كدا في فيلم ومع ډخلتي عليه وهو بيعمل كدا زعقت فيه جامد واتخانقنا وشوية ولقيتني بدعي عليه ربنا يعمي عنيه عن القرف دا عشان نرتاح.
خد نفس وأنا فضلت في مكاني جامد دماغي مش قابلة تستوعب اللي جاي وهو كمل پقهر ودموعه رجعت تنزل تاني
كام يوم بالظبط ولقينا تليفون جايلنا من المدرسة عشان نلحقه لإنه وقع وهو بيلعب وبعد ما روحنا وحاولنا نفهم اللي حصل لقيناه وقع وقعة جامدة وهو بيجري في الحوش وعينه جت على حرف الرصيف فاتصفت.. عنيه راحت وبقى كل اللي بيقولهولي بابا أنا مش شايف وأنا.. أنا مش قادر أعمل حاجة وأنا من جوايا حاسس إني أنا اللي عملت فيه كدا بدعايا عليه.. بقالي أسبوعين دايخ