إسكريبت لاسراء جمال

تاخدي نصيب من إسمك تقدري تعملي حياة جديدة بس مش بنفس الشخصية!
أسفه لو كلامي ضايقك بس يمكن كل اللي مشيوا مكنش عندهم جرأة أو وعي يقولوه بس إتأكدي إنه كان لازم تسمعيه علشانك مش علشاني!
هزت راسها وقامت من جانبي فهمت إنها مش قادرة تتكلم وبصراحة عذراها.
أوقات الحقيقة بتاكل في قلوبنا بتوجعنا بس لازم نعرفها زى الدوا بالظبط مر بس مش هنكون كويسين من غيره والحقيقة كمان كده!
وسمعت الصوت اللي بقى الأقرب لقلبي النور الخامس رن يمكن أنا متفاجئة بجرأتي وقوتي في الرد بس المواقف بس اللي بتخلينا نعرف قدراتنا الحقيقية!
بصيت للقلم تاني تفتكر أنا جرحتها بالكلام بس كان لازم حد يعرفها الحقيقة أنا متأكدة لو هي تعبانة دلوقتي ف أكيد ده هينفعها لحياتها لو اللي فات ضاع ف هي تقدر تبدء من دلوقتي!
مشيت وأنا بسيب جزء من مشاعري مع كل شخص بقابله كل شخصية بتخليني أكتشف حاجة جديدة عن نفسي كل شخصية بسيب جزء من مشاعري وطاقتي معاها.
مشيت والمرة دي كانت غريبة!
كان فيه يافطة نازل منها عصاية متثبتة في الأرض مكتوب عليها المهمة الأخيرة معايا أنا...إمشي في وشك لحد البحيرة اللي في آخر الطريق بعدين إدخلي يمين هتلاقي مقعد وأنا قاعد عليه.
مشيت فعلا الطريق أكيد ده حد عارف إنه مجرد مهمة!
يا ترى مين ده اللي عنده الجرأة دي كلها إنه يعلن عن ده!
كان المكان هادي جدا كنت بتمنى لو أعيش في الهدوء ده بعيد عن دوشة العالم كله!
وصلت للطريق الموصوف وإتفاجأت بيه!
كان هو نفس الشخص اللي لابس قناع......!
_ده إزاى
ماهو أنا مهمة..
_مش فاهمة!
إقعدي هفهمك.
_أديني قعدت إتفضل.
أنا إتحطيت آخر مهمة علشان مكنش ينفع أظهر قبل كده وعلى فكرة مش أنا اللي مخطط ولا حاجة هما اللي مخططين أنا برئ خالص.
_رغم إن أشك بس ماشي خلينا نخلص من عالم سمسم ده مشكلتك إيه
مشكلتي هي إن مش عارف أحب نفسي..
_فيه سبب أكيد ورا ده!
السبب بنت حبيتها من وهي صغيرة واضطريت أسافر لمدة ١٢سنة لما رجعت وطلبت إيدها رفضت كانت نسياني أصلا حكمت عليا من برا حكمت عليا إن إتخليت عنها زمان.
_وإنت شايف إن الحب يستاهل إنه تكره نفسك علشانه
مش الحب اللي يستاهل هي اللي تستاهل.
_بس إنت لازم تحب نفسك حب مش مشروط لازم تحبها سواء الناس معانا أو لا لازم تحبها في كل حالاتها وفي كل الظروف نفسك هي الداعم الوحيد ليك نفسك هي اللي هتخليك تنجح وكل اللي رفضوك هيندموا إنهم مكنوش مقدرين قيمتك قيمتك فيك إنت إنت بتقلل من نفسك لما تحط قيمتها في قيمة الناس بتقلل من نفسك لما تخلي حد في الخانة اللي قبلها نفسك لازم تكون قبل كل الناس وإلا هيرفضك الكل مفيش بنت بتحب راجل ضعيف.
أنا فعلا ضعيف أنا لو كنت قوي مكنتش سيبتها زمان وسافرت علشان اهلي حتى لو كنت مجرد طفل لو كنت قوي كنت قدرت أقنعها تديني فرصة أشرح وجهة نظري.
_ويمكن الغلط فيها هي يمكن هي اللي مش بتقدر اللي قدامها ولا بتسمع التبرير!
بس هي أجمل بنت في الكون.
_أوقات الحب بيعيمنا عن حقيقة اللي قدامنا.
حتى لو كانت إنت!
وخلع القناع وإتصدمت باللي شفته!
كان آخر حاجة أتوقعها!
_عمرر!
مقدرتش أمسك دموعي إزاى نسيت صوته بس أنا مسمعتوش غير مرة من سنتين أول ما رجع ورفضت أشوفه تاني ولا أسمع حرف أنا حتى وقتها مسمحلتوش يتكلم كنت قاسېة أوي معاه!
مفاجئة مش كده
_إنت...
مالك إتوترتي أوي كده ليه
_عمر إنت مش فاهم حاجة